【六個背影】
每年寒冬，民政事務處都會同我哋長者服務單位合作，將福袋交俾我哋，送俾有需要嘅長者。
擔任外展隊隊長七年，舊年冬天，係我第七次、亦係後一次，寒冬送暖。
你有興趣知道箇中情況嗎？請花一分鐘睇落去吧！
15-12-2016 (四) 天氣寒冷
四間屋企，兩對夫婦、兩個獨居，六位長者……
丈夫83，肺癆、心臟病、疑似肺癌，上月初跌落入院留醫個半月，啱啱出院一星期，噚晚半夜，輪到佢76歲胃癌、腸癌、糖尿病太太因狂嘔不止緊急入院。
67歲，從未結婚、無親無故、患有心臟病、糖尿病、白內障、同我同一日生日嘅貝多芬，過去四個月，因心口痛，入過三間唔同醫院，醫生要佢通波仔，佢驚得滯即刻簽紙出院。
86歲獨居黄伯同樣冇結婚、無親無故，為人固執，步行困難仍堅拒送飯，話啲飯難食，結果一年跌幾次！我幾經艱辛終於舊年三月說服到佢幫佢排老人院，宜家慶幸每星期有愛心義工上門探望佢。
73歲、天生小兒痳痺，要坐輪椅、胃癌、已切除三份一個胃、血壓高，42歲左眼視網膜脫落引致失明，右眼因白內障同近視只剩一半視力。當年36歲嘅佢娶咗29歲嘅弱智太太，婚姻唔被睇好，親人離開，兩個人冇仔女、無親無故，但慶幸有教會關心。丈夫傷殘，太太弱智，行動亦難，但彼此深愛對方，互相扶持卅七年。
喺呢個入冬嘅早上，讓我為你哋送上關懷同心意……
喺我2017年2月轉換另一個工作崗位前，我一定會確保你哋有另一個好嘅開始。
Search